本文重點
愈來愈多有關中央政府擬收緊銀根嘅消息，本月以來，A股顯著受壓，且明顯見到資金流出，並非毫無原因。眾所周知，上半年唔少銀行貸款違規入市炒作，為了避免「東窗事發」，如今都趕緊沽貨套現。
講開新能源股，上周專門從事製銷風電相關齒輪設備產品嘅中傳動（00658），股價跌至15.96元即告反彈，上周五收報19.18元，買盤積極，相信短線調整已完成，可以重新關注。
查實，中傳動所生產嘅傳動設備，除了可應用於風電業之外，還可應用於高速列車及城市軌機車。未來，中國將大力拓展城際交通，而歐洲嘅高速鐵路運輸網亦會喺未來十年擴大兩倍，故雖然目前呢瓣業務貢獻有限，但策略意義重大，可為長遠增長奠下基礎。
此外，阿莊仲記得，中傳動最大單一股東喺今年五月曾減持6,500萬股股份，每股作價13.7元，相信貨源落入大戶手中。喺七月份，中傳動股價曾高見21元。
風電產品長做長有
未來幾年，風電相關產品需求增長明顯，中傳動嘅擴產進度正好配合市場需要，前景可以睇好，相信接咗貨嘅基金大戶，唔會咁短癮。七月下旬以來嘅調整，基本上已消化七月中旬嘅升幅，上周止跌回升，若嚟緊交投配合，有機會再次挑戰21元阻力位，50日線支持喺17.3元。