咁究竟發生咩事呢？原來外電當時報道，中銀監計劃要求將銀行交叉持有的次級債從附屬資本中全額扣除，間接限制了銀行的貸款能力，令市場新增資金減少。有心人就藉有關收緊銀根的消息，即刻狠沽2,000張期指。之不過，其實單料幾日前已有聽聞，再加上內地股市都無跌，反映有人想渾水摸魚、企圖隊個市落嚟。雖則話今次2萬點守得住，但唔排除有心人可能會發動第二輪攻擊，大家真係要步步為營，小心為上！

六行中的三行，交行（03328）、工行（01398）及建行（00939）已相繼公布半年業績，雖未有帶嚟太大驚喜，惟盈利增長平均略高於市場預期，表現其實已有交代。不過想提提各位，內地上半年大開水喉，商業銀行力谷信貸配合，三家銀行六月底的核心資本充足比率，不約而同地降至單位數字，而交行及工行的撥備水平，更有不足的情況，期內撥備覆蓋率分別只為123%及138%，與中銀監要求年底達到150%，仍有一段距離，故相信下半年內銀股的業績，未必能夠如上半年般標青。