結好控股（00064）尋日一支大陽燭，高收0.8元，大升8仙。股價已突破由上月底嘅高位0.96元回落形成嘅下降軌，而成交增至8,300多萬股，較上交易日多3.5倍。有大成交支持，可確認調整完成，重展新升浪，短期若能升穿前高位0.96元，可向1.5元水平進發。
結好證券業務剛好食正經濟復甦、股市展大升浪嘅勢頭，而澳門最近幾個月博彩業收益亦已大幅上升，結好兩瓣主力業務都「掂當」，勢將刺激股價大升。
結好上月底成功引入人稱「細劉」嘅股壇猛人，於旗下澳門金都酒店成立「名店倉」，開多一瓣澳門獨一無二嘅新業務，有細劉相助，勢將吸引內地遊客光臨，不難將金都塑造成為澳門嘅旅遊熱點。
結好前景好，大股東亦以行動支持，由月初至今，已先後買股11次，共增持1.575億股，股價由0.725至0.874元不等。跟大股東上車，照計唔會蝕底，睇長少少，博翻一番，已值1.5元。
結好控股（00064）目標價：1.5元 止蝕價：0.7元