中移（00941）中期純利同比增長1.4%至553億元人民幣，略遜於預期。但一如所料，中移嘅每名客戶平均用量（ARPU）持續受壓。展望下半年，資本開支高於上半年，而單係七月份，上客數量創近三年新低。
難怪昨日公布業績後，股價迅即回落，結果倒跌收場。阿莊始終認為，若然要買中資電訊股，喺三大之中，中移未來幾年都係捱打嘅一個，投資聯通（00762）嘅值博率會較高。
唔經唔覺又到八月底，距離十．一黃金周尚有不到六個星期之距。聽講今年內地十．一黃金周連中秋節假期，將長達八天之久，今次真真正正係「黃金假期」。
本來預計喺今年五．一落實嘅深圳市非戶籍居民來港個人遊措施，如無意外會喺十．一黃金周實施。有鑑於這個「黃金周」特別長，若然期間真係有更多同胞訪港，將有助刺激香港旅遊業。故此，未來數周可以密切留意相關嘅受惠股份，如遠東發展（00035）、莎莎國際（00178）、六福（00590）、周生生（00116）等。
陸續有內房股公布中期業績，中國海外（00688）半年純利增長31.8%至30.4億元，不過，富力地產（02777）純利下跌90%至1.6億元人民幣（已計及退還佛山地而損失已交付按金2.4億元人民幣）。
基本上，去年末季內房業觸底，今年首季確認「回春」，次季樓市價量齊升，故見內房企業中期業績表現大致較年初市場估計嘅為佳。
講開又講，北京北辰（00588）近日亦公布中期業績，純利同比增長4.25倍至7.86億元（人民幣．下同），其中核心經營業績5.34億元，增長2.57倍，主要受惠旗下奧運媒體村項目入帳。
復甦因素已作反映
今年上半年，內房股急劇反彈嘅情況，不大可能喺下半年重現。相反，類似北京、上海等主要城市，樓價需要時間進行整固，交投亦可能縮減。北辰下半年嘅合同銷售收入目標為14.3億元，略低於上半年嘅16.12億元。
此外，北辰嘅投資物業收入表現亦未許樂觀，待今年底開始，國家會議中心及其配套項目陸續竣工，開業初期還可能要「捱」一段較長嘅時間，對業績造成壓力。
以現價計，似乎已充分反映了行業復甦嘅因素，顯然目前並非進取嘅時候。