本文重點
金管局總裁任志剛將於十月退休，喺呢十六年嘅監管生涯入面，同任總交手最多嘅不外乎一班香港嘅銀行家，臨別依依，銀行公會同埋銀行學會就決定喺九月尾設宴同任總餞行，呢次名副其實係最後一次同任總「同枱食飯」。
反應踴躍 手快有
銀行界人士爆料話，今次同任總最後一次飯局反應非常踴躍，名額已爆滿，大部分銀行都趁早買定至少一張枱，真係手快有手慢無。
太子計過，以一間喺港島具水準嘅酒店計，最大嗰個宴會廳可放廿幾圍，一圍坐12個人計，今次排場有300幾人。聽講任總已答應會賞面出席。呢間被選中嘅港麗酒店，下月嘅廿八日晚將會星光熠熠。
據聞呢個晚宴純粹坐埋同一張枱食吓飯，會有任總分享心聲環節。銀公同埋銀行學會會向任總致謝一番，負責致謝嘅代表睇嚟應該唔少得搞手之一嘅銀行學會行政總裁梁嘉麗，甚至今屆嘅銀公主席王冬勝嗰份！