過去兩季A股市場升勢甚急，喺八月下旬率先調整，或者可以避免喺十月前後出現大幅波動。無論如何，「是福不是禍」，短線還是要密切留意資金動向，提高持倉風險意識。

選股策略方面，阿莊建議短期暫避金屬、內房、礦務及金融等股份，轉移目標至消費、電訊設備、醫藥等股類。

講到醫藥股，期待已久嘅國家基本藥物目錄終於揭盅，307種藥物納入報銷，其中102種屬中藥。官方定調，有關建立國家基本藥物制度嘅計劃，將於今年起試點實施、二○一一年初步建立，二○二○年全面實施。

同仁堂受惠藥物名冊

同仁堂科技（08069）旗下多項產品包括牛黃解毒丸、板藍根顆粒、安宮牛黃丸、六味地黃丸、狗皮膏等被列入目錄之內，其次廣藥亦有多項產品在目錄之內。相對廣藥嘅升勢，昨日同仁堂股價僅升3%，顯得落後。

從事製銷筆記本電腦業務嘅巨騰（03336），剛宣布截至六月底止中期業績，純利同比微增2%至2.89億元，受到原材料價格及產品平均售價下跌影響，期內營業額下降8.8%至31.24億元，但就較銷售成本同期跌幅11%為細，總體毛利率反增2.2個百分點至17.8%，反映公司控制成本得宜。

回顧期內，首季全球消費市道處於「冰河時期」，巨騰中期能夠維持平穩，已算難得。下半年經營復常，照計往績市盈率（現價八倍）具參考價值，估值吸引，應可繼續獲機構投資者捧場。

提及巨騰，又令阿莊想起同屬台資股嘅內地消費股中國旺旺（00151），公司將於下周一宣布中期業績。

雖然同樣面對原材料成本下降嘅情況，惟料旺旺嘅食品及飲料產品平均售價相對穩定。再看同類股康師傅控股（00322），今年上半年營業額及純利都能保持雙位數字增長，反映食品及飲料消費行業經營情況良好，對旺旺同期經營表現亦有正面啟示。

若旺旺嘅中期業績顯示，公司有能力維持整體業務增長，估值應具上調空間。近日大市調整，卻不難發現此股有大行密手吸納，阿莊選擇繼續持有，靜候佳音。