三執董爆沽貨疑雲

港交所（00388）股權披露資料尋日公布，電盈董事總經理艾維朗喺電盈持股由0.2%跌至0.15%，另外兩名執董鍾楚義及彭德雅嘅持股亦下跌。咁大件事梗係要查證，原來係佢哋所持嘅購股票據失效，根本無減持股份！

呢批失效嘅購股權，喺二○○○年八月十七日起計嘅九年有效，行使價11.78元，按購股權分布，艾維朗佔320萬、鍾楚義佔357.52萬、彭德雅佔27.2萬，目前佢哋仲分別持有三批，行使價介乎4.35至60.12元嘅認股權，其中60.12元嗰批於明年六月到期，其成為「廢紙」嘅機會率相信非常之高。

電盈今日公布中期業績，唔知係咪負面新聞太多，管理層再次避見傳媒，業績發布會只係招待分析員，一般投資者只可收看網上直播。