港股ETF率先喺台灣掛牌之後，寶來台灣卓越50基金（03002）今日都會正式喺本港上市。台港ETF互相掛牌終於圓滿落實咗，梗要飲番杯喇！
同一般上市公司喺掛牌嗰晚舉行祝捷酒會唔同，尋日發行商寶來證券率先舉行酒會。
冠蓋雲集見證歷史
現場嘉賓冠蓋雲集，台灣證券交易所董事長薛琦也親自來港見證歷史，本港銀行、證券公司以及台府駐港機構均出席畀面派對。
太子傳媒老友報料，現場有好多中資銀行同埋投行代表噃！好似交行（03328）、建行（00939）、工行（01398）、海通證券、招商證券等，都嚟齊晒。
薛琦來到梗係要推銷吓隻ETF。佢透露，佢夫人嘅投資組合中有一隻台灣卓越50基金，大家明啦！
