本文重點
中信1616(01883)尋日公布業績,响金融海嘯中都做到盈利上升兼增加派息,都算難得,怪唔得一班管理層都幾好笑容。
其中兩個幾好笑容嘅係行政總裁阮紀堂同財務總裁陳天衛,皆因佢哋兩位講慣廣東話嘅大男人,尋日可以堂堂正正咁用母語去present上半年嘅業績表現,自然流暢得多,在場傳媒聽落都覺得順耳啲。
點解咁講?事關集團前主席石萃鳴在位嘅時候,講明一班管理層要用國語去present業績,响公司開會時亦要講國語,搞到不善國語嘅Norman(阮之洋名)同大衛(陳之洋名)之前都要頂硬上。
石總退休 唔使講國語
不過石總早前已宣布退休歎世界,換上辛總辛悅江,唔知辛總係咪放過佢哋,當辛總用國語present完之後,接力嘅Norman笑住話可以轉台講番廣東話,大家即時感受到Norman嘅瀟灑又翻番來。
其實諗番轉頭,石萃鳴命令佢哋講國語,都係為佢哋着想,等佢哋可以多啲練習,依家淨係聽廣東話,反而無搞笑場面。