內地股市昨日大幅下滑，滬深股市分別跌逾5%及6%。港股跟隨外圍跌市裂口低開，恒指下試2萬點關見承接，收報20,137點，跌755點，大市成交747億元。中國商務部表示，七月份全國進出口總值逾2,000億美元，外貿景氣出現企穩迹象，下半年外貿出口降幅有望收窄，甚至可能出現月度回升。講開又講，昨日見報提及嘅出口股利豐（00494）跌3.7%，報26.75元，可耐心觀察23至25元承接再定策略。
有消息指，首家內地創業板股份有望於十月中旬掛牌，由於這類股份有點像風險投資，業務尚處投資期，集資規模及市值不能與主板新股相比，故料短期市況調整不會左右其推出進度。相反，吸收香港創業板嘅失敗經驗，相信內地一係唔搞，一搞會認真搞好，至少首批上市嘅創業板股份應該會係悉心挑選嘅潛力股，A股股民豈會放過炒賣機會？
光控不妨睇位翻兜
炒股賺錢與否就要睇各自修行，但內地券商就勢必多咗生意做。今日登陸上海證券交易所嘅光大證券（601788），中長線表現值得期待；至於持有其股權的光大控股（00165），短期調整若守穩喺50日線20元樓上，又可以留意翻兜機會。
屬大半隻中資公用股嘅粵海投資（00270），本月以來股價由高位調整幅度已達15%，已回落至50日線水平，可以留意低吸機會。
眾所周知，粵投主營東江水業務，單係供水業務已佔其總收入逾四成，其他業務包括物業投資及發展、收費公路及橋樑、發電、酒店營運及管理，以及百貨營運。由於香港與廣東省政府已簽訂○九至一一年嘅香港供水協議，故可以說，粵投未來數年嘅業績已有一定保證。
善用現金流增回報
今年六月，粵投走出廣東，成功投得天津地塊，擬作為發展天津天河城購物中心項目，預計總投資金額21億元人民幣，初步預計總建築面積約19.3萬平方米，預期將於二○一三年投入商業營運。顯然，粵投係想將「廣州天河城購物中心」嘅成功經驗，搬到天津市發揚光大，而選擇落戶天津，相信係睇好環渤海經濟嘅消費市場前景。
以粵投每年經營業務現金流達三、四十億元，未來幾年要以內部資源應付呢個項目嘅資金所需，綽綽有餘，結合早前落實向合營電力擴建項目增資，種種舉措告訴投資者，公司善用現金流作出新投資，以提高資金回報，此舉有助提高公司嘅估值。若股價再跌，料可吸引價值投資者入場支持。