本文重點
上市公司陸續公布中期業績。太子尋日睇中期業績時，見到一份好搶眼及好特別嘅業績通告。間公司業績亮麗之外，份通告嘅整體設計有別於一般黑白嘅業績通告，仲加插彩色編版，cover girl係中國網球好手鄭潔，非常吸引，咁有心思係邊間公司？咪係內地體育用品商安踏（02020）囉。
網球明星包辦封底面
上市公司通常會先以最簡單的「通告式」發放業績，但安踏就好細心，中期業績報告有成62頁咁長，圖文並茂加埋公司代言人嘅相，包括中國乒乓球好手王皓、鄭潔等。而底面人物係另一名網球明星Jelena Jankovic（珍高域）。
呢份業績報告咁有心思，原來係佢哋開會時「腦震盪」諗出來，至於點解搵兩位「網球雙嬌」做封面及封底，原來安踏喺今年四月，已經搵咗珍高域及鄭潔做代言人，佢哋會着安踏品牌既網球服飾比賽，兩位雙嬌仲幫手設計以佢哋為名既網球鞋添。至於安踏嘅成績點亮麗，至六月底止賺6.08億人仔，增40.1%，每股派息12港仙。