唔經唔覺，金融海嘯爆發快要接近一周年，環球經濟開始漸見「萌芽」，如本港今年次季GDP也錄得3.3%的按季增長，令各界人士難免舒一口氣。不過，股友們係唔係就此可以掉以輕心呢？對此確實仲有保留。
美國聯邦存款保障機構於上周五決定，接管擁有250億美元資產的殖民銀行（Colonial BancGroup），係當地今年第74家倒閉的銀行，亦是最大型一家。此外，雖然銀行於數個月前曾有新資金注入，但最終都係難逃一劫。既然金融市場仍然未穩，相信金融海嘯後遺症陸續有嚟，睇怕早前炒業績升咗一輪的大笨象滙控（00005），股價都要回一回氣。
講開業績，一直被睇低的利豐（00494）終於可以吐氣揚眉。期內純利增長13%，兼且加派股息，刺激股價於上周五急漲近一成，連帶另一隻出口股思捷（00330）都升逾8%，難怪咁多大行都即刻出報告，唱番好佢咯。
連利豐都咁叻仔，將於周四公布業績的中移（00941），本人就唔敢太過睇小嘞。內地電訊業被「三分天下」後，市場競爭無疑加劇，令中移於今次升浪中明顯落後。
即使股價早前靠回歸A股概念出現突破，但係到依家仍未企在90元樓上，後市或有上升空間，估計炒業績概念輪都輪到呢隻重磅股啦。