國家統計局將於今日公布七月份CPI及PPI數據，此前滬深股市繼續反覆偏軟。阿莊相信，七月份經濟數據表現已喺市場預期之內，唔會左右目前嘅政策方向，而A股市場將繼續保持大漲小回格局。

太陽日誌

放大圖片

上海證券交易所擬於明年正式推出國際板，迎接香港紅籌股海歸。阿莊早已指出，呢項發展係好事，但難免令人擔心，會唔會分流呢批權重股在港嘅成交量，不利港股表現。

放大圖片	在適度寬鬆的貨幣政策之下，中行經營可持續改善。

昨日升市，市場便流傳，內地喺啟動推出國際板嘅同時，正在加緊研究重推「港股直通車」，加強兩地資金互動，共創雙贏。被視為最受益嘅股份港交所（00388），昨日收報146.4元，升2.8%。

其實，今年六月，廣東省官員亦曾提出建議，爭取中央政府支持兩地證券公司開展港股代理交易，以及合格境內機構投資者業務（QDII）試點嘅建議，另提議增加人民幣嘅投資渠道，並容許香港人以自有人民幣購買A股，這些構思被視為「半港股直通車」。

有序推「港股直通車」

其後，深圳市政府又宣布一系列中港金融合作建議，包括H股和紅籌與深圳B股互換到對方股市掛牌買賣，讓內地人在深圳買港股ETF，甚而是由深、港交易所聯機，讓內地居民直接投資境外證券等等。

查實呢啲建議，即等同有序推出「港股直通車」。若然年底前相關研究有進展，並可於明年與紅籌海歸同步進行，對於推進兩地金融市場發展，幫助甚大。

回說港交所，公司將於周三公布中期業績，受惠上半年股市交投回升，以及新股大旺，相信中期業績還可以，此前可留意相關嘅Call輪或牛證。

另外，內銀股業績期亦將至，阿莊正實中國銀行（03988），事關喺適度寬鬆嘅貨幣政策之下，內銀淨息差上升，中行嘅經營表現將見到改善，加上匯兌虧損數額下降，亦有助業績增長。展望未來，中行將致力把人民幣資產所佔比例由65%增至80%，此舉有利提升盈利能力。以現價計，估值仍屬保守，最近中金便將中行嘅目標價大幅調高至5.07元。

除咗中行之外，旗下中銀香港（02388）已成功開展香港跨境人民幣貿易融資業務，未來將有更多機會分享兩地金融市場融合所帶來嘅商機，吸引力不遜於做阿媽嘅中行，兩「母子」都值得捧場。月杪公布業績前，可留意低吸機會。

順帶一提，昨日見報嘅聯想集團（00992）收市報3.93元，阿莊亦坐言起行，以平均價3.94元買入10萬股。