滬深股市上周五分別跌逾2%及3%，投資者被「動態微調」四字嚇壞。內地三大部委聯手派發「定心丸」，指貨幣政策沒有微調，不會採取規模控制辦法來控制商業貸款，並會致力保證股市穩定健康發展。
顯然，中央政府唔想大家再誤會，以為嚟緊會有咩調控措施，免令當前經濟復甦嘅大好形勢有所動搖。
港股方面，上周似乎有內地大戶出貨，國企指數走勢明顯跑輸大市，乃近期鮮見嘅情況。阿莊則認為，若然短期大市只係調整，國企指數應該會最快完成整固，並重現升勢，否則大家便要提高警覺。
預計明年回歸A股
聯想集團（00992）上周宣布截至六月底止首季度業績，雖然錄得虧損1,600萬美元，但未計因季內進行重組項目而錄得300萬美元重組費用之經營溢利則為1,600萬美元，可見透過執行戰略手段，改善營運及提升核心優勢，公司已經喺「止血」方面取得一定嘅成效，若次季度呢個良好勢頭持續，應有助確認業務回穩。
阿莊估計，聯想最快可於第三季度確認重現盈利能力，順利過得呢一關，未來業務將由海內、外市場雙引擎推動。
此外，預期公司將於明年進行海歸A股計劃，展望消息流正面。既然已預示否極泰來之路，要跟坐順風車，有心唔怕遲，中期向上較大嘅阻力喺5至5.5元水平，向下3至3.2元已形成一承接區，值博率有數得計。