上星期，內地一個「動態微調」令到中港兩地股市作出較大調整，上證指數更加回調至3,200點水平，恒指雖然仍然守得住20,300點關口，但唔少細價股就見散散哋。不過，上周五在跌市底下，主板成交金額升至936億元，相信唔少股友都開始清貨行動。
咁又難怪，皆因細心的股友們，於過去兩個交易日，相信都應該留意到大市有一個共通點，就係成個市況都係先後靠中國移動（00941）以及滙豐控股（00005）來支撐，此舉令人聯想到，有人希望托住個市方便沽貨。果真如此，股友們真係要打醒十二分精神啦，皆因市場資金一撤離，料港股調整幅度勢再加劇。
再講，繼滙控揭開業績期序幕之後，今個星期唔少大藍籌都陸陸續續公布業績，好似港交所（00388）、長實（00001）、和黃（00013）、平保（02318）以及港鐵（00066）等，故認為大市焦點將重落在藍籌股身上。
講番市場消息，近日內地資源性產品價格改革有加速迹象，水、油以及電價均先後傳出上調聲音。有見及此，國家信息中心亦都表示，天然氣價格或有較大幅度上漲。內容提到，自中國的天然氣價格改革後，價格一直非常便宜，基點很低，再加上鋪設管道成本很高，故認為天然氣價格有大幅上漲的機會喎，要留意啦！