此外，上海市官員亦首次明言，為推進上海建立國際金融中心嘅長遠規劃，明年外資企業可喺上海交易所發行A股上市。咁講法，大紅籌海歸講咗幾年，明年終於實現。不過，陸續有大藍籌回歸A股，意味着在港嘅股份交易量可能減少，不利港交所（00388）。然則，內地會否有來有往，研究正式啟動「港股直通車」，則屬後話。

講到大紅籌海歸，除咗中資電訊股外，盛傳被列入首批海歸紅籌名單者，還有中海油（00883）。有消息指，中海油擬委任中金、高盛和中信證券安排發A一事，受相關消息刺激，昨日其股價一度高見11.16元，收市報11元，升3.58%，成交15億元。

經濟復甦支持油價

中海油本身從事勘探、開發、生產和銷售海上石油和天然氣。近期油價再展升勢，紐約期油重上每桶70美元水平，展望下半年經濟復甦步伐加快，石油需求回升，將繼續支持油價表現，這對於專門從事石油上游業務嘅中海油，影響毫無疑問係正面。

今年首季，中海油實現總日淨產量56.68萬桶油當量，同比增長15%，其中原油及石油液體日產量46.8萬桶，同比增長19.7%，主要來自去年新投產嘅項目蓬萊19-3二期B平台，西江23-1和文昌油田群等。不過，季內公司實現嘅總收入下降41.9%至139.5億元人民幣，主要係實現油價同比下降53%至每桶41.56美元。幸好次季以來油價回升，意味着其經營表現將獲得改善。

另一方面，跟地產發展商要不斷買地充實土儲一樣，油公司要不斷透過收購和勘探，以充實油儲。今年以來，喺渤海油氣勘探工作方面，繼新發現渤中2-1和秦皇島29-2後，最近公司成功鑽獲錦州20-2北，這些發現有助提升其中長期油氣儲量，對上調估值幫助甚大，惟此因素尚未完全反映喺股價上。

阿莊認為，即使未計海歸因素，中海油嘅合理價可以去到高盛所定嘅目標價13元。若落實海歸計劃，則估值尚有上調空間。雖然經歷過中石油（00857）發A（601857）股價一步到位嘅痛苦經歷，也許內地股民對中海油海歸熱情不及中石油，但作為首批海歸嘅紅籌，相信表現唔會差得去邊，可以買番多少，揸一年半載，相信會有唔錯嘅回報！