本文重點
夏日炎炎，金融界人士都趁機充電，輪流放假。太子認識嘅金融界朋友，十個中起碼有幾個正係過緊快樂假期。放緊假或者放完假嗰啲暫且不講，不如講吓即將會放假充電嗰啲。
僑豐金融行政總裁許照中，今個周末就會去台灣小休幾日。點解咁匆忙只去幾日？原來佢下個禮拜要趕返嚟香港，開港交所（00388）董事局會議，審議今年上半年業績，都算係個盡責嘅董事。
下個禮拜三係港交所公布中期業績嘅大日子，原本冇咩特別，但原來今次係港交所行政總裁周文耀最後一次主持業績發布會，所以分外令人注目。
周光暉留港陪子女
前會計師公會會長周光暉，今個暑假就冇出外遊埠，事關佢話佢啲「老闆」（即係仔女）喺外國放暑假返來，佢要做「跟班」抽空陪伴他們。但係其實佢仲忙過啲子女，今個月下旬係業績期，佢係招行（03968）同中遠太平洋（01199）獨立非執行董事，除咗要開董事會審議業績，又要開審計委員會會議。