尋日在一個飯局認識一位專門做歐美出口，OEM、ODM家電生產公司的老闆，對下半年展望，同較早前見面「淡淡地」的老闆相似，承認歐美企業庫存大減，近期補貨的急單的確多咗，但對比○七以至○八上半年有長期訂貨計劃的光景相比，仲係兩個世界。

其實即使班老闆唔講，近年工業股汰弱留強情況日益明顯，即使歐美外判比例無停過擴張，波鞋一哥裕元集團（00551）、手機界代工龍頭股富士康（02038）等，在資源調配及供應鏈管理優勢下，都係愈做愈強，市佔率不斷提升，反之，中小型公司生存空間不斷萎縮，結果係贏家得天下。

產品質素得到肯定

尋日唯冠（00334）異動勁升四成，反之，營業額幾乎大唯冠四倍的LCD龍頭股冠捷科技（00903），卻紋風未動，跌近1%報收4.17元，但如果睇番兩股今年累積升幅，其實相當接近，都係六成七咁上下。規模有分別，冠捷經營情況亦高唯冠幾班，○八年後者虧蝕，冠捷逆境下倒退四成六，都還有9,800萬美元利潤。

形勢上，更省電及纖巧的液晶電視及顯示屏，近年正全面取替傳統CRT，但可能更多人質疑，係產品生產並不涉及太高技術含量，不過是買來主要部件LCD Panel、IC Driver，再找工人組裝，但自從取得飛利浦品牌使用權之後，唔少人對冠捷的發展有所改觀，至少其產品品質得到肯定，亦都有借用品牌發展的野心。筆者認為，以一間行業龍頭，出口外地也背靠潛力不菲的中國市值，十倍多估值，現價應未完全反映基本因素。

冠捷去年被中國電子信息產業集團在市場不斷增持，已經和飛利浦成為平頭大股東，近期這新進大股東，照辦煮碗不斷在市場吸納液晶顯示晶片設計公司晶門科技（02878）股份，已成大股東，意圖已昭然若揭，應不會純粹滿足於代工生產咁簡單。