大笨象中期業績略優於市場預期，散戶為之振奮，亦陸續有大行調高其投資評級及目標價。不過，阿莊就認為，大笨象現價已反映歐、美業務喘定嘅因素，未來股價能否更上層樓，要視乎回內地上市嘅進度，喺呢方面有進展前，高追要三思。
前日阿莊買入短炒嘅通達集團（00698），昨日一度高見0.275元，由於一步到位，所以堅持食胡，以平均價0.255元沽出，獲利約1.9萬元。此外，由於大市已到咗短期目標21,000點，故阿莊亦趁高獲利，昨以平均價22.35元沽出4萬股中保國際（00966），獲利約29萬元。
內地股市高位波動
不獨港股，昨日A股亦喺高位波動，滬綜指早段創3,478點反彈以來新高後，中段被金融股下跌所拖累，一度倒跌，幸尾市煤炭股及石化股發力，才得以接近平水收市。顯然，股市有點高處不勝寒，但升市難估頂，只有按照個人可承擔嘅風險和投資目標，量力而為，阿莊則選擇逐步減持，「袋袋平安」最實際。
美元兌主要貨幣匯率一度跌至雷曼破產幾周後以來嘅新低，觸發這輪跌勢，乃有更多數據顯示，經濟衰退步伐正在減慢，令投資者流入美元以求安全投資嘅需求下降。金價及油價齊現異動，紐約油價及金價同創七月多以來嘅新高。不過，短線商品股升勢有點急，就如中國鋁業（02600），眨眼已升抵10元阻力位，宜待整固過後再作考慮。
開發流感病毒試劑
轉移視線至落後板塊，醫藥股表現相對落後，股價已整固逾月嘅銘源醫療（00233），昨以大成交上揚，收報0.92元，升10%，值得關注。
銘源主要從事研發及產銷蛋白芯片（測試劑）、醫療保健業務及經營醫院。近期流感數字再增，豬流感（H1N1甲型流感）病毒開始變種，對於相關嘅診斷及治療產品需求殷切。六月中旬，銘源與上海人類基因組研究中心及上海生物芯片，就「甲型流感病毒試劑」簽訂合作協議，一經有關部門批准生產測試劑，估計可於年底前投產，正好配合秋轉冬流感高峰期嘅需要。
銘源股價喺六月份由0.7元水平一口氣炒上1.38元，至今股價已調整逾月，昨日現大成交，可視為整固完成訊號。在新測試劑量產前，股價料再掀升浪，目標再試六月份高位，向下宜穩守0.8元。