本文重點
金融海嘯之下，會計行業受到唔少影響，唔少四大行嘅職員都要放無薪假、甚至被裁。因此，會計師公會決定「賣大包」，推出多項紓困措施幫助會員渡過難關。
會計師公會今年將會推出一次過嘅會費退款計劃380元，估計因為退款計劃，大概需要退番1,100萬元畀會員。
會計師公會仲會成立一個信託基金，幫助有財政困難嘅會員，公會將會注入300萬元，而現時個信託基金只有約100萬元。而一年一度嘅會計師公會周年晚宴係行內嘅重頭戲，唔少會員都會出席聯誼一番，順便收集吓業內最新嘅行情消息。會計師公會亦會就晚宴作出資助，將晚宴嘅收費減一半，由950元一位，減到480元。
成立網站助求職
由於唔少會計師被裁或者調職，會計師公會於今年六月亦成立咗一個網上招聘網站，方便會員搵工，亦會提升設施同課程，方便會員進修。會計師公會行政總裁張智媛希望透過喺金融危機中繼續投資，令會計行業未來發展會比現時更強壯，唔知各會員同唔同意呢？