外圍氣勢如虹，A股周三大跌一日之後亦迅速收復失地，上證昨日升2.72%，重上3,400點關口。股市一跌，人行仲驚過班散戶，即刻派定心丸，話會維持適度寬鬆貨幣政策，冇低位撈底之散戶大嘆走寶，又到唔識驚之地步。

港股亦聞雞起舞，中段創20,712點年內新高，收市升339點，報20,573點，成交800億元。外匯基金狂賺，但任總潑冷水話，全球股市上升係脫離基本因素，任總早前在《觀點》亦提出警告，有「阻人發達」之嫌，人之將退其言也善乎？

滙控成升市火車頭

滙控（00005）出中期業績前夕受到追捧，單日抽升3.4元，並以接近全日高位77.1元收市，此升幅好耐都未試過，基於今次大行預測分歧好大，亦有好多非特殊項目，散戶好難再睇PE決定抵唔抵買，但睇P/B仍係得1.4倍，在炒經濟復甦預期之下應仲有上升空間，加埋有發A股之憧憬，滙控可繼續成為升市火車頭。

相反，中移（00941）已顯得「過氣」，市佔率及ARPU不斷下跌，兼且要減價爭3G客，逆市下跌並不為奇。

踏入八月，係大公司業績期，恒生（00011）、渣打（02888）、長和系、宏利（00945）、港鐵（00066）、港交所（00388）陸續有來，對大市之影響不言而喻。

但睇昨日公布業績之恒隆系，以及滙控已提早祝捷來看，業績期將可帶動港股另一輪升勢。

防守性強之恒隆集團（00010）和恒隆地產（00101）昨分別升逾5%，大唐發電（00991）發盈喜亦升5.38%（其實係去年上半年盈利基數太低），連剛發完盈警之江銅（00358）及中遠（01919）都話咁快回升，可見市場樂觀氣氛之濃！

汽車銷量捷報頻傳

駿威汽車（00203）昨升近5%，收報3.85元，可再挑戰4元關口。今年上半年，中國汽車業受惠於低排量購置稅調整、汽車下鄉及以舊換新等種種優惠政策，汽車銷量迭創新高，駿威附屬廣汽本田的銷量亦傳捷報，六月售車34,394輛；一至六月共售163,364輛，同比增14.77%。

集團今年銷售目標為33萬輛，當中，上半年已售13萬輛，上半年銷售勝於預期，故將全年目標或調整至36萬輛。加上集團下半年再有新車款推出，相信目標不難達到。另外，公司六月銷售成績也有很大增長，王牌車款第八代「雅閣」銷16,399輛，環比增長16.74%；中檔車「范鋒」銷11,878輛，首次突破萬輛。