本文重點
香港人成日畀人話唔團結，尤其係生意人，個個掛住自己搵銀，但太子又唔係咁睇。好似尋日，太子傳媒老友收到香港上市公司商會發出嘅新聞稿，話常務委員會新委任咗9名成員，令委員數目增至28個，老友望真吓，發現9名新常委全部係地產商嘅代表，而且仲係最大嗰幾間添。
地產界九人入常委會
新常委包括恒地（00012）執董兼財務總監歐肇基、新地（00016）執董及財務總監陳國威以及執董李成煌、和黃（00013）副集團董事總經理周胡慕芳、新世界（00017）執董梁志堅、長實（00001）企業策略部總監及公司秘書楊逸芝等，唔睇清楚仲以為係地產商會。
上市公司商會話，擴大後嘅常委會畀到商會更充裕嘅財政資源拓展會務，太子覺得，大地產商都派員入去做常委會會員，除咗財政資源加強之外，更重要就係商會嘅「牙力」會大大提高，日後與監管機構談判時就更有Power啦！