陸續有大行加入唱好本地地產股，一向被視為地產大好友嘅瑞銀就表示，全球寬鬆貨幣政策，令資金供應上升，內地資金充裕，加上本港3萬億元現金存款，喺零息及抗通脹下，刺激資金流入資產市場，造成資產泡沫。
該行預期，今年六月至明年十二月，本港住宅樓價會上升32%，並調高地產股目標價。阿莊亦相信，未來十二個月，低息環境不會有多大變化，資金要尋求出路，股、樓二市成主要去處。
「環保」係二十一世紀投資市場嘅重要概念，喺港股市場上，近年新能源板塊亦迅速崛起，多得內地政府嘅政策配合產業發展。近日，國務院總理溫家寶到訪吉林市一家風電技術公司考察，並就發展風能發電提出幾點意見，強調電力行業總裝機容量必須和市場互相配合，且須防止發電設備產能過剩。換言之，風電產業發展規模必須合理，保證產業可持續發展，而不能「一哄而上」。
呢番話表明，中央希望這門新興產業嘅發展，必須重視效益，避免盲目投資，相信日後相關部門喺審批風電新項目上，會加緊控制，具備技術、資本和市場實力嘅大型電企，較具競爭優勢。
注資機會陸續有來
中電新能源（00735）乃中國電力（02380）嘅姊妹公司，由五大電企之一嘅中電投集團作為最大單一股東，故說要有大型電企撐腰呢一關肯定合格。早前公司獲注入江蘇省大豐市風電項目，若可換股票據獲悉數行使，大股東變相增持股權，由28%增至33%。
截至去年底，全國五大發電集團擁有風電裝機總規模達685萬千瓦，其中中電投集團擁有32.8萬千瓦。中電新能源既成為其拓展新能源嘅旗艦公司，日後想必獲得注入更多新能源資產，喺大股東嘅支持下，快高長大，股價自然不愁炒作藉口。
再看其股價走勢，喺0.6元水平已徘徊兩周，正醞釀新升浪。查實今年首季及次季，呢隻股都各炒咗一轉，且升幅都達到一倍，第三季股市熱炒，相信唔會有例外，保守計目標見0.8元，樂觀啲睇1元，穿0.55元止蝕。