不過，佢就唔似得孔丹同秦曉咁鍾意捉圍棋，而係勁鍾意寫詩，仲作咗唔少添。北控老友同太子講，佢唔係咁輕易攞畀人睇㗎，有人問過佢寫詩嘅嘢，佢依家都會話四十年前都仲寫嘅，家陣都係鍾意運動多啲囉。

北控內部搞「530運動」

衣總話佢只要身在香港，都會成日喺清晨去行吓太平山，唔單只係佢自己咁鍾意運動，佢仲喺北控內部推廣「530運動」，究竟係乜冬冬？原來係叫啲員工每周五日，每日至少要步行半個鐘，仲認真到公司所有中層員工配埋計步器，唔知年頭年尾會唔會計住佢哋行咗幾多步就加幾多人工呢？