講真A股真係全無基本因素可言，講到明成渝合理價唔夠4元，但因為炒供求，A股價一樣可以升到無晒譜，反映內地股市仍然係一個極之唔成熟嘅市場。中國移動（00941）講咗話今年暫未有興趣發A股，照樣炒回歸概念，昨日升4.2%，到底係另一重磅股滙控（00005）無力再上，抑或大戶為咗挾高中移，硬要安一個炒作藉口，呢層筆者不得而知。

史提芬昨日啱啱講過，樓價好難跌，話口未完，瑞銀又唱好本地樓價，指至今年底，樓價一年可升32%，明年再升20%，建議買入長實（00001）同恒隆地產（00101）。高盛亦睇好地產股，表示在利好因素支持下，地產股仍值得吸納，咁啱又係睇中長實，同時建議買新地（00016）。內房股同樣有追捧，中央或全國性實行收緊第二套房貸呢個所謂負面消息，投資者已忘記得一乾二淨。

昨日航運股表現出色，中遠控股（01919）亦錄得近一成升幅，但相對其他航運股已逼近52周高位，中遠控股相對落後。集團是內地最大的集裝箱航運公司，母公司中遠集團則是世界第二大的綜合性航運企業，公司業務涵蓋集運、乾散貨、物流、碼頭和租箱等，實力毋庸置疑。

波羅的海指數回升

去年的金融海嘯，拖累全球航運市場幾乎陷入停頓，投資者對航運股睇法極度悲觀，不過中遠控股擁有充裕的現金流，加上母公司有可能注入資產，故較其他航運股更具吸引力。最近波羅的海指數持續反彈，投資者對航運股的悲觀情緒已逐步減弱，尤其大市已累積一定升幅，落後股份更具追捧價值，下跌空間有限，現價買入亦放心。波羅的海指數目前略低於4,000點，相對去年最高點為12,000點，只要經濟確認復甦，航運運費仍有上升空間，航運股自然可水漲船高。