四川成渝（00107）A股（滬601107）昨日掛牌，兩度漲停，全日高位做15.25元人民幣，收報10.9元人民幣，較招股價升兩倍，惟其H股收市價僅為3.6元。見到咁嘅場面，就知道咩叫「瘋狂」！

太陽日誌

放大圖片

光大控股睇位食胡

光大證券亦啟動A股IPO活動，光大控股（00165）股價備受追捧，昨日以全日最高位25.1元收市，大升11%。阿莊慶幸喺開車前揸咗多少貨，睇勢有機會上28元水平，會視乎情況食胡。

放大圖片	市場熱炒經濟復甦概念，資源需求有望回復增長。

此外，阿莊揸咗年幾嘅中國平安（02318），好不容易終於返家鄉，昨日高位曾見70.7元，收報68.45元，照計短期有勢挑戰去年五月初高位77元水平，會繼續耐心持有。

一如所料，本地地產股亦發力追上，長實（00001）昨日重登紅底股寶座，收報101.4元，升2.55元。同系嘅和黃（00013）亦大有追落後條件，可以多望兩眼。

下半年投資市場嘅炒作概念，源自經濟復甦。而經濟好轉，工業生產活動恢復，資源需求自然有望回復增長，故見資金樂於追逐相關股份。事實上，就如內地，上月全國發電量已扭轉持續八個月嘅負增長局面，而七月上旬數字亦持續錄得正增長，可見煤炭業前景終現曙光。由於去年下半年比較基數較低，未來將有更多數據證明煤炭業走向復甦之路，買煤炭股有心唔怕遲！

喺煤股之中，神華（01088）昨日創五十二周新高32.7元，相對而言，中煤能源（01898）現價才10.96元，較五十二周高位14.4元仍有一段距離，博煤股大翻身，呢隻係最值博。

事實上，今年上半年，中煤原煤產量較去年同期增加約6%，產、銷量分別接近全年目標嘅48至49%。若然下半年需求持續增長，動力煤價格回穩，則全年計經營可望超標完成。

最近同業神華亦表示，上半年銷售基本達標，而下半年情況肯定優於上半年，又指下半年煤炭進口將會減少，而出口則會逐步復甦，全年計銷量有望高於年初估計。

經濟復甦資源熱炒

龍頭企業對行業展望語氣正面，相信中煤亦唔會差得去邊。執筆期間，傳來中煤與內蒙古遠興能源就共同開發煤製甲醇項目及煤礦項目簽訂合作意向書，料消息對股價有刺激作用。現價追入，博上14元，調整宜守9.8元。

除咗煤股之外，唔少細價礦務股亦蠢蠢欲動，就如從事生產開採及加工處理鋅、鉛和鐵嘅悅達礦業（00629），上月初現大成交後股價回落，經歷一個多月嘅收集期後，近日股價緩緩向上，若小圓底回升論成立，短期股價可望再衝1.6至1.7元水平。