尋日中港兩地股市齊齊上揚，恒指一開市就升穿了20,000點關口，全日共有62隻熊證被收回，其中10隻恒指熊證更加係未上市就已被強制回收添。尋日大市升勢真係幾全面，幾乎所有板塊都有得升。在市場水浸之下，熊仔熊女都仲要再忍耐一下。
國家推出連串利好各行各業的政策，已經漸見成效，多行業均先後有好消息傳出。近期又再傳中央將以百億基金推動文化產業，當中會通過貸款貼息、項目補貼、資本注入等方式促進文化產業的發展，唔知今次會否帶來一個新炒作藉口呢？
另方面，隨着近日內地多個城市先後提高水價，發改委日前表示，當前各地調整水價，目的都只係想節約用水以及提高用水效率，但就要充分考慮社會承受能力，防止集中出台調價項目。
市場一直有傳，發改委將規限地方上調水價，成為水業股的一個不明朗因素。故雖然尋日水業股普遍跟隨大市向上，但跟炒之餘，亦要隨時提防有不利消息出現。