有傳內地或會調低成品油價，石化股借勢發圍，中石化（00386）一度高見6.84元，收報6.63元；上海石化（00338）及儀征化纖（01033）亦受帶動，分別上升7%及5%。不過阿莊都係嗰句，石化股升勢向來短暫，除非即市睇勢跟進，否則急升後才入市高追，未必划算。
前日阿莊講過，近期明顯見到有資金流入新能源板塊炒作。其實，究竟發展新能源，是否具備經濟效益，大家都係得個「估」字，但內地政府要支持這門新興產業發展，態度卻十分明確，故見炒家一於少理，繼續留守於這類股份。
昨日中傳動（00658）股價創五十二周新高，高見20.95元，而剛進行配股集資嘅中國風電（00182），股價亦以大成交上揚，收報1元，升7.5%，睇成交和走勢，相信好戲在後頭。
迎合國策，係投資中資股嘅不二法門。今年以來中資汽車股嘅升勢，足以說明一切。講開又講，內地環保汽車的抬頭，帶動周邊產業興起，從事生產電動車電池嘅天能動力（00819），可以多望兩眼。
天能主要從事生產動力電池及可再生能源產品，去年營業額達26億元（人民幣．下同），純利2.34億元。業績顯示，公司在內地電動車電池市場嘅市佔率達到22%。其主要產品為鉛酸動力電池，佔總收入97%，其餘則來自鎳氫電池、充電器、控制器及驅動電機產品。
受惠原材料鉛價回落
受惠主要原材料鉛價回落，去年公司鉛嘅採購成本，於扣除增值稅後平均下降15%。雖然鉛價波動，但正由於公司擁有一定嘅市場份額，故有能力保持相對穩定嘅產品售價。
據研究報告顯示，去年內地電動車電池嘅銷售收益總額達到16.4億美元，預計二○○八至一三年複合年增長率達26%。目前首六大電動車電池製造商，已佔去市場近五成份額，而天能則居於首位，日後公司大可透過購併加速擴張，以鞏固領導地位。
去年五月，天能宣布總投資額達2億元的江蘇可再生能源項目，已於去年底竣工，今年開始投產，所生產嘅產品包括與風力及太陽能有關嘅新儲存電池產品。適逢內地剛宣布啟動「金太陽工程」，光伏發電專案最高可獲七成補貼，看來天能嘅新項目投產來得正合時宜。
觀其業績表現，今年以來股價反覆向上，升得有道理。本來，此股較理想嘅吸納價，係等候回落至2.6至2.9元區域才入市收集，但若驚手頭冇貨，亦可以先買第一注，只要今年業績繼續保持增長步伐，論估值，應該不愁買家追捧。