本文重點
尋日內地網站登咗段關於中糧集團董事長寧高寧被停職嘅報道,話寧總已接到上級調令,佢將會畀人停職兼要「外出學習」,但集團職務同待遇暫時都唔會改變,不過就唔畀佢再參與集團事務,仲話正式文件將會喺呢幾日下發,依家件事仲未有向內部通報咁話。
澄清無被停職調查
太子睇完篇報道好驚訝,打電話畀傳媒老友問個究竟,之後得悉寧總主動喺北京辦公室總部度打電話畀內地傳媒澄清,話自己根本無畀人停職調查,仲話會通過法律手段將件事調查清楚。
太子老友七點幾打咗個電話畀寧總,仲以為寧總一定會好火滾,點不知佢笑到嘻嘻聲咁聽電話,原來佢同朋友食緊飯講緊笑話,「外出學習」件事對佢一啲影響都無,但中糧集團旗下有兩間上市公司即中糧控股(00606)同中國食品(00506)啲股價就因為呢個傳聞而分別跌咗2.4%同2.9%。