本文重點
前稱智富能源嘅國際資源（01051），早排被人偷步沽空令到股價大插水，件事好轟動金融圈，近期靜咗一陣。尋日又有搞作，但今次並唔係收購、配股或者係引入策略性投資者，而係進一步強化董事局同管理層嘅班底，公司宣布，委任恒生銀行（00011）前大班柯清輝做副主席同獨立非執行董事，柯大俠同時會做埋公司嘅審核委員會同薪酬委員會主席添；而原副主席Owen L Hegarty就會接替劉夢熊博士做國際資源嘅主席，劉博士就退居幕後，只做執行董事。
獲委國際資源副主席
公司無解釋到點解搵柯大俠出山，不過銀行前大班想搵嘢做，情況應該同退休高官差唔多—都係唔憂做，但今次柯大俠搵咗間剛轉型做礦業嘅公司効力，好似同佢之前做開嘅銀行業無太大關係，加上公司股價早前大插，睇來大俠呢次要花啲功夫先得，不過大俠出名落力（聽聞佢以前响辦公室會自己聽電話），相信大家都好想睇吓佢點締造一個多贏局面出來。
除咗柯大俠，國際資源仲搵咗五礦集團前高層馬驍做執董同副行政總裁，同時搵埋中國科技（00985）主席趙渡做執董添，淨係睇牌面，都已經知道國際資源嘅班底愈來愈唔簡單，真係邊類人才都有！