國美（00493）在成交額猛增至逾10億元下，勁升近兩成，唉……都係志強唔夠耐性，上星期忍唔住以1.96元沽出，諗住淨贏供股新股先鎖定盈利，誰知錯過大茶飯。昨日以約24,220元參與供股，將獲發36,000股供股新股，若新股出籠時，國美股價能守在2元之上，接近5萬元純利袋袋平安。現持有之中電能（00735）繼續進行整固，一於再坐一會等食胡，暫時不作任何其他投資。
股仔繼續個別發展，第一視頻（00082）又創今年新高，睇嚟彩票股有概念，值得捧場。瑞信將於本月底為幾隻彩票股進行非交易主導路演（Noon-deal Roadshow NDR），包括御泰中彩（00555）、亞博科技（08279）及雅高企業（08022），唔排除呢幾隻股份，係彩票股下一輪炒作目標。
上述三隻股份中，以御泰最似樣，主要係三股中以佢最先轉型搞彩票，去年全年盈利大幅攀升96%至2.68億元，期內集團營業額11.73億元，當中11.5億元來自彩票業務。昨日見成交回升，走勢轉強，料新一輪升浪展開。里昂出過報告建議買入，目標價1.1元，買入持中線，可博股價翻一番，短線目標則先睇0.8元。