2.2億鎊入股Diageo

近日中投嘅新搞作，瞄準食品行業，大手用2.21億英鎊，入股英國酒水公司Diageo，名列第九大股東。Diageo來頭唔小，旗下酒水飲品好出名，品牌包括健力士、Johnnie Walker威士忌同埋Smirnoff Vodka。間公司話環球市場，尤其係俄羅斯收縮得好勁。不過，相信今年盈利可錄得4至6%增長。

中投係金融海嘯前入嘅貨都蝕好多，入貨時以為執到寶，點知大摩、黑石股價都插水，結果搞到中投係內地受到唔少質疑，董事長樓繼偉都好大壓力。近期中投分別投資過加拿大嘅能源公司、加碼認購大摩新股、認購熱爆嘅香港新股金隅（02009），同埋入股中信資本。

太子尋日見到外電報道，澳洲國庫部長Wayne Swan已批准神華（01088）收購新南威爾士州西北部六處農業田產，咁即係話，神華可以喺獲得煤炭勘探權嘅區域展開畜牧業務。