中國建築（滬601668）發行A股IPO周三開始公開招股，集資最多510億元人民幣，成為今年全球集資規模最大嘅新股，自不然成為焦點。不過，A股市場好似冇有怕，昨日深、滬股市同以高位收市，兩市主板總成交達3,500億元人民幣，睇個勢經得起重啟IPO嘅考驗，A股市場將走進新台階。摩通說滬綜指突破3,000點，係真正牛市嘅開始，聽落亦有道理。
後市方向明朗化，重磅股飛升。騰訊（00700）成功進身「紅底股」。受惠利好氣氛，阿里巴巴（01688）股價昨日亦同創五十二周新高。此外，中資汽車股繼續「狂野」，東風（00489）、吉利（00175）、比亞迪（01211），股價升完可以再升，問你服未？
酒店業務潛在價值高
大升市重磅股唔使多作推介，依家蒙住雙眼買入一線地產股，仲有贏面，畢竟上半年發展商售樓收益勝於市場預期，股價升得有道理。
講開又講，近期遠東系股份有異動。遠東控股（00036）股價連升三大棍，昨日再升44%，收報1.21元；遠東酒店（00037）亦見異動，收報0.305元，升29%；相對落後嘅遠東發展（00035），昨日午後亦發力，收報1.86元，升11%。
遠展最近宣布截至今年三月底止年度業績，收入17億元，純利8,554萬元，同比下跌80%，每股盈利5.3仙，末期息每股2仙，可以股代息。基本上，業績表現倒退係意料中事。
次季度酒店業務經營環境仍然嚴峻，展望未來三個季度，內地將正式實施非深戶港個人遊措施，至少香港嘅酒店業務應有改善空間。截至今年三月底止，遠展共經營十三家分別位於香港、馬來西亞及內地嘅酒店，預計未來三年將增設十家酒店，呢瓣業務嘅潛在價值甚高。今年五月，公司收購停車場業務，除了可帶來穩定現金流外，日後會否與酒店業務一同包裝成REITs上市，要拭目以待，
此外，遠展喺內地及海外亦有不少物業發展及投資項目，其中位於上海嘅住宅發展項目，受惠於今年以來內房價格及成交改善，以及明年上海世博帶動投資氣氛。
截至三月底止，遠展嘅每股資產淨值為2.7元，現價較之折讓三成，更何況其酒店資產總值57億元，但僅以28億元入帳，可見潛在折讓幅度甚巨。近月股價走勢營造出小圓底，昨日急升有成交配合，若短期成交得以維持，追落後目標可見2.2至2.3元，調整宜守1.65元。