馬蔚華最新發表咗篇文章，就係用出海游水嚟比喻內地銀行國際化嘅過程。佢話內銀事實上仲未出海游水，所以就算金融海嘯捲到嚟，佢哋都講唔上話遇溺淹死。

不過佢出海個心意係好堅決嘅，內銀遲早都要下海，遲早都係要國際化，依家就要學好游水，等下一次再有洪水突襲，內銀都可以化險為夷。

死守內地難國際化

其實招行早幾日就已經處女下海，喺英國倫敦開咗第一間代表處。馬蔚華話，如果死守內地，根本就學唔識游水，今次係要出去了解遊戲規則，知道風險係咩回事，又要睇吓咩類型業務先搵到錢，練番一招半式。