恒指尋日以接近高位收市，升443點，收報18,805點。滙控（00005）因為美國銀行股業績唔錯，連日抽升搶眼之外，預期市盈率仲係十一至十五倍，十分便宜的中資金融股又再發威，唔少人或者仲擔心緊恒指萬九點的三頂阻力，但睇番國企指數尋日升243點收報11,146點，已搶先創出雷曼爆煲後新高。再睇上星期表現最差藍籌，港燈（00006）及中電（00002）等高防守性股份走勢遠落後大市；反之，等於押注中國製造業及出口復甦的碼頭經營者招商局國際（00144），卻呈現一周升幅達18%，幾乎是指數三倍升幅的表現，或多或少反映基金經理對經濟及股市樂觀的態度，2萬點目標，看來指日可待。

中國建築大有作為

早前推介過的中國建築（03311），話說公司計劃由港澳建築生意擴展到內地基建項目，業務規模當然不可同日而語，尤其逐次計數的建築生意，建造、營運及轉移（BOT）收費路橋工程相對回報穩定得多，而近水樓台，公司一早已經與控股公司中國建築股份達成協議，未來加強合作。

尋日中國建築宣布5供1股集資13.51億元，供股價2.79元，比消息曝光前3.1元折讓一成，投資者罕有地對集資十分受落，股價不跌反升，收報3.21元，升0.11元，升幅3.6%，理由係所得資金預測會加速其基建項目投入，聞樓梯響多時的轉型終於實現。計計數，攤薄後預期市盈率大約十六至十七倍，等供股前調整入貨，相信仲大有作為。

同樣多得母親眷顧，海信科龍（00921）以12.38億元（人民幣．下同），向大股東青島海信收購製造及銷售白色家電（包括空調、冰箱及洗衣機）以及模具業務，基於本身實力麻麻（去年底股東資金是負10億元），淨負債接近17億元，母公司在交易中，體貼地自願接受乖仔用公仔紙找數，科龍以每股A股3.42元，發行以3.62億股支付。

白家電市場競爭大

科龍股價尋日復牌後急升，收報1.73港元，升0.33元，單日升幅兩成三。回顧過去五年，科龍艱苦經營，但累積虧損仍然達38.7億元，往績衰到貼地，亦已經連續四年年結出現資產負值情況（簡單來說是資不抵債），小股東老早打定輸數，所以任何資產注入，應該都係對舊股東有益無害，即使用12.38億元買入盈測年賺6,380萬元、等於19.4倍PE的生意，都覺得除笨有精。

發行新股之後，科龍A與H股總計數目升至13.54億股，套用H股收市價，市值是23.4億港元（用A股計價高達82.7億元人民幣），中期發過盈喜，預測上半年可錄得1.5億元盈利，用最理想的計算方法，下半年一樣咁賺錢，再假設新收購一月一日已入帳（當然會計上並無可能），科龍賺3.68億元人民幣，市盈率5.6倍，或者對於內地白家電市場感到陌生的外資芬佬，會認為抵到爛，但清楚內地白家電生意難為，幾大生產商業績「長紅」的股民，興奮過後歸於現實，仲係覺得科龍並唔吸引，可炒但不是好的投資對象。