鎊匯瀉 英國平咗28%

根據《經濟學人》嘅統計，英國一個巨無霸嘅售價折算成美元大約賣3.69元，比起舊年嘅4.57美元，足足跌咗28%，反映英鎊過去一年走勢疲弱，《經濟學人》仲話呢個情況相信係英國首相白高敦，喺明年大選前一個頭痛嘅問題。計落英鎊過去一年跌咗成18個巴仙，雖然對英國出口有一定幫助，國民嘅購買力就大打折扣嘞。

統計又發現，以巨無霸指數計算，歐元係最貴嘅貨幣。歐元區一個巨無霸值4.62美元，美國巨無霸就賣3.57美元，反映歐元兌美元嘅匯價被高估近三成。

至於喺香港一個巨無霸盛惠1.72美元，係全世界最平嘅地區；中國大陸就要1.83美元；舊年係全球「平霸」嘅馬來西亞，今年賣巨無霸就要1.88美元一個。