不過，公司可能再諗清楚，都係唔太方便股東，所以公司尋日發出公告，決定更改股東會地點，由原來嘅香港會改為尖沙咀帝苑酒店，日子則由七月二十九日，延遲至八月二十四日。

德昌無交代點解要改地點，但太子估計，都係因為街外股東意見太多，其中唔少話公司因為想避見股東同傳媒，所以揀响香港會開股東會，企圖「隔一隔」。

會所規矩多

不過據太子公關老友講，依家响中環、金鐘一帶搵酒店搞function真係唔易，貴都唔在講，而且好爆，成日搵唔到場，反而香港會原來唔係大家心目中諗嘅咁貴，加上佢又設咗會員制，即係話街外人想响嗰度book場搞function都唔得，所以係一個唔錯嘅選擇，不過嗰度規矩始終係多，所以今次德昌最終決定更改股東會地點，都算係從善如流啦！