內地陸續公布最新經濟數據，次季GDP同比增長7.9%，按季上升1.8個百分點，致使上半年內地經濟同比增長達到7.1%。有咗上半年嘅基礎，全年「保八」目標已成功咗一半。

全家總動員認金隅

新股北京金隅（02009）今日開始招股，全城熱爆，既然預計成功認購比例唔大，若有心認購，都係棄入大飛，轉打「人頭戰」，全家總動員，填多幾張表認購實際啲。

人和商業（01387）股價連升近半個月，昨日上午宣布擬收購內地6個地下購物中心嘅經營權，並停牌半天，下午復牌通告披露，公司擬以先舊後新方式，按每股1.86元配售20億股，集資37億元，而控股股東亦以同樣價格配售10億股舊股，套現18.6億元。

翻查資料，人和喺去年十月才掛牌，招股價1.13元，當時集資額約32億元，唔到一年又再配股集資，真係快咗啲，但由於呢隻股生於「金融海嘯」期間，當時冇乜散戶認購，街貨有限，加上依家配股價喺招股價樓上，控股股東配股出街，擴大股東基礎，亦未必係壞事。

內地上半年零售銷售近6萬億元人民幣，增長15%。內需巨輪繼續發力，下半年零售市道有望維持暢旺。飲料及食品股統一企業（00220）股價自上月底急升後，一直企穩喺4元樓上整固，似乎仲有後着，可以密切留意。

統一主營方便麵及飲料業務，去年收益92.41億元（人民幣．下同），增長6.8%；毛利率34%，上升0.4個百分點；惟純利下跌18.9%至3.4億元，主要係匯兌虧損淨額大增十二倍至1.51億元，加上行政開支增加58%至4.16億元。由於今年以來原料價格持續低企，相信上半年公司嘅成本壓力應得到紓緩，但無可否認，公司嘅內部營運效率及成本控制有改善嘅空間，且看今年中期業績，喺這些方面所下嘅工夫是否有效。

加緊擴大業務版圖

上月，統一與安德利果汁（08259）宣布成立一家合營企業，項目總投資額為2億元，註冊資本1億元，主要從事各類飲料、果汁、茶飲料、乳飲料、礦質水、果凍、布丁、果漿、PET瓶裝注塑及吹瓶等業務。由於安德利本身從事銷售濃縮果汁等業務，結合統一擁有全國知名嘅消費品牌，二者合作應可擦出火花。

此外，喺兩岸關係大吹暖風之下，台資企業正在加快喺內地嘅布局，早前統一母公司便證實，正與數家內地飲料企業洽談購併，當中不排除跟滙源果汁（01886）商談重啟合作。阿莊亦相信，統一股價能否衝穿5元阻力位，要視乎下半年能否落實具體嘅購併計劃，季內是否有好消息，不妨拭目以待。