本文重點
不少人到北京公幹或旅行，都會特別到聞名的秀水市場逛吓，的而且確由二十多年前嘅街頭攤販小檔，到今時今日嘅多層商場，秀水市場已經成為北京重要嘅景點之一。
為加強推廣，秀水市場就以50萬元人民幣嘅年薪，向全球招聘市場總經理。
年薪50萬聘總經理
秀水市場開出50萬元年薪，已接近內地外資企業部門主管水平，但所提出嘅選聘條件亦非常嚴格，應聘者雖無性別、專業背景及戶籍限制，但就須符合「精通英語、寫作能力強」、「具在大型外企公司領導崗位工作經驗」、「極強公關能力」、「富有思想」等十六方面嘅能力。
秀水市場之所以要出重金禮聘市場總經理，一般相信係由於秀水市場急於提升形象，事關喺不少人眼中，「秀水市場」就係「A貨市場」嘅代號，而如何帶領秀水市場走出「翻版陰霾」將關係到商場嘅持續發展。