中資朋友尋日報料，話隻滙源果汁（01886）「第二春」有可能好快落實，睇走勢亦好對辦，尋日股價已突破近期嘅徘徊區，並一舉升穿10日、20日同50日3條平均線，MACD出現買入訊號，加上有大成交配合，可確認大升浪展開，短期目標先睇8元，若收購事件重提，股價隨時可翻一番。
滙源係內地最大嘅果汁、蔬菜汁以及其他飲料嘅生產商，以銷量計，其百分百果汁同中濃度蔬菜汁均居市場首位，分別佔42.1%同43.6%嘅市場份額。
滙源嘅龍頭地位獲可口可樂垂青，於去年提出以每股現金12.2元收購建議，涉資達180億元，其後計劃被中國商貿部以反壟斷法否決而告吹。
最近蒙牛（02319）為保持民族品牌而引入中糧集團，成功變身為國有企業，而滙源大股東既有意功成身退，有關方面應有責任為其另覓「佳偶」。尋日內地有消息流傳話滙源好事近，加上股價異動，話唔定真係好快有好消息。
滙源果汁（01886） 目標價：8.0元 止蝕價：5.5元