之前成日聽人講，話經濟唔好、股市又唔好嘅時候，煙酒銷情就特別好，睇番近日情況，似乎真係有啲根據。啤酒股青島啤酒（00168）啱啱發完盈喜，又再獲大行唱好，所以幾時都話，唔好輕視傳統智慧。

唔知大家有冇留意尋日尾市時段，標智滬深300（02827）股價突然爆上，榮登升幅榜首。奇怪的是，明明呢隻指數股全日價位只係徘徊喺37至38元左右，但收市前兩分鐘卻忽然成咗兩單高價交易，分別係53.45元成咗9,000股，同埋53.75元成咗600股。到底係有人隔空掃貨定係落錯盤，抑或有其他原因，暫時都未知，但好想睇吓今日仲有冇下文。