孫女出嫁猛人到賀

聽聞呢餐喜酒有不少猛人到賀，「校長」喺香港證券界有頭有面，且有一定江湖地位，自然多人嚟捧場。

呢粒孫女係「校長」大仔李國麟個女，當晚有去飲宴嘅人都大讚新郎新娘郎才女貌，好登對。

同「校長」深交嘅「潮州怒漢」詹培忠，由於當晚唔喺香港，所以未能赴會，但詹培忠話，「校長」今次返嚟香港，已經同佢見咗兩次面，大談近況。

詹培忠話「校長」近況不錯，依家佢一年時間中，大約有六至七個月喺泰國，有三個月時間喺多倫多，其餘時間就會返嚟香港同埋周圍旅遊。

泰國搞酒店過日辰

咁平時「校長」有乜搞作呀？聽講佢喺泰國有買地興建小型酒店，從事地產發展同投資，做生意賺錢只係其中一個原因，另一個原因係有人會同佢報告發展計劃，佢又可以發表吓意見同觀點，藉此過吓日辰。佢下個禮拜至會離開香港。

「校長」係本港股壇具爭議性人物，一方面佢奠定香港證券業發展，但當年因股災停市決定，亦引起政府大力改革交易所。