市況回穩，股仔乘機再起「革命」，上周五本欄見報推介嘅濱海投資（08035），收報0.46元，升21%，成交達1.13億元。阿莊見昨早隻股突破0.4元，拿拿聲喺0.405元追入80萬股，短線目標試闖0.5元關。
青島啤酒（00168）發出盈喜，預計今年上半年純利同比增幅將達到六至七成，主要受惠產銷量上升，帶動收益增長。如無意外，青啤今年將再次實現盈利雙位數字增長，龍頭地位穩固，估值可繼續較同業享有溢價。
講開啤酒股，要數冷吼對象，阿莊仍然偏愛金威啤酒（00124）。
現價較NAV存折讓
金威係廣東省政府旗下嘅啤酒企業，由粵海控股持有52.4%股權，而次大股東喜力亞太釀酒中國則持有21.3%股權。
過去三年，金威採取「走出廣東」嘅戰略，但代價不菲，事關喺省外興建新廠房，涉及大量財政資源，導致公司負債上升，加上新廠投產初期嘅攤銷費用龐大，又萬料不到去年上半年原材料價格高企，接着下半年又出現金融海嘯，省內工廠現結業潮，啤酒銷量亦受到影響，新廠投資回報期被迫延後，致使公司連續兩個財政年度業績「見紅」，成為一隻幾近被投資者忘記嘅啤酒股。
查實隨着公司於前年中進行供股集資，以及資本投入高峰期過去，去年金威嘅經營現金流已回復正數，截至去年底，總負債已由○六年高峰期約7億元降至4.1億元，手頭現金及淨額2.4億元，每股資產淨值1.74元，現價較之折讓15%。
走出廣東策略正確
今年內需股當旺，金威係難得股價仲較NAV呈折讓嘅實力啤酒股。再講，計及近兩年先後落成嘅三家新廠，目前金威喺內地擁有八家現代化啤酒廠房，遍布汕頭、天津、東莞、西安、成都、佛山及深圳，覆蓋華南、華北、西南、西北等地，預計到二○一四年，年產量將超過250萬噸。以現時公司資產淨值近30億元、但市值僅25億元，未計品牌，齋計廠房資產都唔只值咁嘅價錢！
阿莊相信，過去金威走出廣東嘅策略沒有錯，隨着資本投入高峰期過去，只要廣東省市場穩定下來，業績有改善空間，而省外嘅布局還是有望逐步走向收成期。
目前，兩大股東經已揸咗金威接近74%的權益，公司唔難成為內地三大啤酒商洽購嘅對象。經驗告訴阿莊，呢類失意股，一係唔發市，發市可當三年。喺呢啲位持貨，輸極有個譜，一旦冷敲成功，回報卻可以好可觀！