本文重點
同投行界嘅人講起中國前總理趙紫陽媳婦任克英，相信無人唔識。呢位投行界女王自從五年前安排國壽（02628）於港美上市，因與大內高手有衝突而突然間離開花旗後，就一直低調行事，江湖上甚少佢嘅消息。但係佢轉親工，就實傳到街知巷聞。
睇住大中華投行業務
尋日又流傳佢九月會過檔法巴，幫法巴嘅大中華投行業務揸旗。啱啱兩個月前，美林先至證實佢辭去中國區投行業務主席職務，呢頭又被法巴網羅。
任克英咁受歡迎，唔淨止出身夠硬淨，最令人佩服嘅係佢做嘢嘅魄力，佢經手嘅內地企業海外上市生意多不勝數，有國壽、聯通（00762）、建行（00939）等等。就算呢兩年低調咗，但都幫美林做咗百仕通入股內地藍星兩成股權單生意。
間間投行都要打內地市場，若然任克英過檔屬實，法巴就可以更加發吓力。雖然法巴唔肯評論件事，但係太子都睇好呢樁美事！