上星期港股跌穿萬八後，窄幅徘徊冇乜方向，不過十個牛皮九個淡，尋日終於頂唔順跌咗落嚟，恒指收報17,254點，跌453點。好彩股仔有第一視頻（00082）帶領，仍見炒鬼入場玩，可惜志強所持中國風電（00182）唔肯行，輸少少沽出。兵貴神速，股仔唔行都係走為上着。以每股0.44元買入50萬股亨泰（00197），希望0.5元附近沽出，博贏一成。
尋日個市急回，除咗怕美國復甦遙遙無期之外，亦怕內地微調，略為收緊寬鬆貨幣政策，都係揀受惠國策股份受影響較小。國務院國資委曾表示要加快推進央企重組，航天一系一直進行重組，中航科工（02357）已行先一步，上周升破2元，昨日逆市再升逾6%，志強估計航天控股（00031）好大機會成為下一炒作目標。航控主要業務包括製造液晶體電視、視聽產品、電訊產品、充電及保安系統等，牌面睇唔算十分吸引，不過其母公司早於四月向國務院申請，向航控注入十間企業，涉及資產逾60億元人民幣，總算為重組揭開序幕。即使未計及注資，航天控股每股資產淨值接近1元，以現價0.77元計算，折讓超過兩成，一旦注資落實，其上升潛力不容忽視。