阿莊始終認為，時值內地經濟復甦嘅關鍵時刻，中央政府冇必要喺呢個時候改變經濟政策，故暫時會維持手上股票組合，靜觀其變。
中國建築（滬601668）開始招股，集資規模達426億元人民幣，乃A股IPO重啟以來，首個真正考驗市場承接能力嘅大型新股集資活動。早前銀監會宣布內銀理財產品新規定，新產品不能投資股票二級市場和基金，亦不能投資股權，唯一跟股市相關嘅係可以投資新股。
無獨有偶，最近中保監重新審批「投連險」，明眼人一睇都知，呢啲舉動正係要引導資金支撐開始擴容嘅A股市場。亦即是話，「維穩」股市目標未變，故股民亦毋須自亂陣腳，堅持跟着政策方向走便可。
東航料有一番作為
停牌逾月嘅東方航空（00670）（滬600115），昨日終於復牌，並宣布購併上航（滬600591）嘅方案，東航A股漲停板，惟H股表現則較失色，由全日高位1.99元回落至1.79元收市，僅升2.8%。
睇幾家大行對於今次交易評價都算正面，照計東航H股股價理應不止於此，唔排除復牌初期整固過後，仲會有一番作為。
上周鄭州燃氣（03928）宣布，鄭州市國資委與華潤集團旗下一家非上市附屬公司——華潤燃氣（集團），就轉讓公司權益達成框架協議，大致係鄭州市國資委讓華燃集團取得鄭燃集團八成權益，而鄭燃集團則持有鄭燃43.18%股權，雙方將於八月中旬簽署正式協議。依此推斷下，華燃集團將會取得鄭燃34.5%的實際權益，屆時或須提全購。
查實鄭燃早在去年三月，已開始籌備發A股集資，以收購鄭州天然氣管道項目、高壓環線及配套工程、建設三個加氣站以及收購煤制氣資產，但其後受到A股市場調整，以及金融海嘯影響，拖延至今仍未有成事，公司已將發行A股建議有效期延至明年五月二十五日。
新投資計劃現曙光
如今鄭州國資委變相退居二線，為鄭燃引入財力雄厚嘅華潤集團為大股東，故即使發A股一事至今尚未明朗，但鄭燃嘅新投資計劃亦現曙光，對鄭燃而言，肯定係一件好事。
不過，有點令阿莊感到不明所以嘅係，華潤集團目前已透過華潤燃氣（01193）經營燃氣業務，今次交易何不直截了當由華潤燃氣出手，而改由一家非上市附屬行事。
街貨疏落升浪未完
此外，究竟未來落實嘅交易，是否涉及要向鄭燃提全購？出價將會如何？日後鄭燃會否保留上市地位？而最終又會否跟上市嘅華潤燃氣拉上關係？這一切一切都自然會惹來好多猜想。
反正喺燃氣股之中，鄭燃嘅估值一向偏低，而且街貨較疏，今次股權轉讓消息，身價提升，足叫投資者另眼相看，難怪股價自復牌以來，累計升幅已有兩成多。除非引入新股東一事有變，相信股價仲未挾完。