尋日新股志高（00449）首日上市，雖然碰啱大市調整，但表現總算冇令大家失望，股價最高曾見過3.12元，縱然後勁不繼，但最終全日仍較招股價升10.57%，收報2.51元。一如早前所講，新股熱潮真係一浪接一浪，絕無冷場。繼琥珀同志高之後，建材股金隅（02009）話咁快又經已殺到埋嚟，將於本周五開始招股，雖然尋日就唔見相關影子股有乜大炒作，但距離上市的日期愈近，料炒作的機會亦會愈高。
至於尋日港股表現就真係麻麻，尤其係因為市場憂慮內地微調政策出台，所以內銀股沽壓沉重，當中跌幅較大的為建行（00939）同交行（03328），雙雙錄得逾3%的跌幅。除內銀股外，一眾本地銀行以及地產股，近日表現也是每況愈下，股友們真係要打醒十二分精神喇。
講番市場消息，尋日內地有報道指，隨着內地經濟近幾個月來逐步回暖，中央開始頻頻發布推進資源稅改革的訊息，從種種迹象看來，相信擱置了好一段日子的資源稅改革，很快將會捲土重來。當中水資源同黃金等，更或會首次被納入資源稅的項目中，相關股份短期或會面對一定壓力。