深圳開業 任總切燒豬

按證去年喺馬來西亞設立咗一間合營公司之後，太子已經覺得按證愈快進軍內地愈好，因為咁多人睇好內地樓價，需求又多，肥水不流別人田之餘，按證仲可以返內地加強「深港交流」，絕對係一石二鳥。

今次同深圳結算中心合作間公司名為「深圳經緯盈富擔保」，由金管局副總裁彭醒棠做董事長，註冊資本1億元人民幣，按證夾錢出資九成。

昨日深圳經緯盈富擔保正式開業，開幕禮認真人才濟濟，除咗任總、羅伯川同彭醒棠之外，當然唔少得按證總裁劉怡翔，同深圳人行兩位副行長張建軍同崔瑜。