本文重點
同金融界嘅武林高手、第一信用財務主席冼國林傾開，冼師傅爆料話佢兩個徒弟喺嚟緊嘅周日會喺散打比賽碰頭，一個係海關譚督察，另一個令太子打咗個突，竟然係平時西裝骨骨出嚟賣樓盤嘅世城（00355）系執董范統，原來香港金融界竟然咁多臥虎藏龍。
拜冼國林為師
當奴（范統洋名）一直Keep得好Fit，但真係唔知佢仲識功夫，當然即刻要搵當奴求證。佢笑笑口話自己大學時代已開始做Gym，仲學過空手道同太極，年幾前被冼國林發現佢骨格幾好，帶佢學散打，依家已經可以試吓比賽。
問當奴有無信心贏？佢話自己五十二歲，對手四十九歲，回氣比佢快，而且對手比佢高兩吋，手長腳長，所以有啲輸蝕。不過，佢話會以技巧取勝，希望嗰日狀態好啲。所以尋日休息，今日再跑吓步練氣。
咁師傅冼國林會唔會臨場觀戰呢？當奴就慨嘆話師傅搞錯比賽日子，所以嗰日佢已經去咗杜拜旅行，剩低兩位高徒決戰。太子星期日有時間都會去觀戰，替當奴打打氣。