港股依然係有波幅無升幅，尋日跌穿萬八關口，收報17,979點，成交額542億元，與A股的3,000億成交完全兩樣。港股從三月開始大反彈，短短日子升近8,000點，毫無疑問後市要健康發展，確實需要一次像樣整固，將把持不定的投機者驅逐離場。筆者唔敢亂估港股需要回吐多少，惟有多做功課，搵業績能夠受惠於經濟復甦嘅股票，等候買入機會來臨。
去年本地銀行股受環球信貸緊縮、CDO同MBS變晒廢紙嘅拖累，業績之差，和九七相比有過之而無不及，但今年情況改善唔少，財資收益唔再受減值影響，拆息低企也為中小型銀行提供廉價資本，對息差有利，何況去年市場普遍擔心資產價格下跌，消費信貸違約可能增加，今日看來都是杞人憂天，影響唔大。
股東回報率直逼恒生
永亨銀行（00302）是筆者鍾愛的本地銀行股之一，財政實力穩健、往績紀錄良好，加上高透明度的企業管治，令永亨在眾多本地銀行股中，成為基金經理的心頭好之一。睇番其股東資金回報率在金融海嘯前不斷有改善，○四至○七年間由16.7%升至20.5%，直逼本地銀行強者恒生（00011）。○四至○七年，香港經濟從後沙士時期復甦的路上，永亨市帳率介乎2至3.73倍，目前在1.91倍，還未到當時下限，今日香港經濟最壞時刻過去，但永亨的估值看來還有很大的上升空間。
地產股升得七七八八，「周邊股」開始異動，尋日輪到專做舊樓購併重建的田生（08136）發威，股價勁升五成，打入勁升股榜首。
受過八萬五的慘痛教訓，今日特區政府對土地政策，變得極度審慎，情願收緊供應也不願平價賣地，維持穩定物業落成量，講到尾都係想托市，避免衝擊港人財富命脈—磚頭市場，地產商向政府買地不成，惟有向私人市場打主意，為專攻舊區收購的公司帶來商機。
田生可作觀察對象
筆者一直相信，香港物業市場資訊流通實在太快太多，除非土發公司出面，私人企業要成功在舊區收購重建唔易，舊樓業主太了解重建的商業價值，也多抱着愈遲首肯、收錢愈多的信念，上世紀鷹君（00041）朗豪坊項目收足十年係一個好例子，但本錢唔多嘅中小公司，點樣可以進行大規模且漫長的收購活動？史提芬雖然唔多看好，但肯定田生會是一個有趣的觀察對象。